Magkakaroon ng malaking pagbabago sa talent management arm ng TV5 matapos kumpirmahin ang nalalapit na rebranding ng MQuest Artist Agency. Sa ilalim ng pamumuno ng beteranong talent manager na si Johnny Manahan o mas kilala bilang “Mr. M,” magsisimula ang bagong yugto ng ahensya sa pangalang “Star Worx.”
Nag-rebranding diumano ang ahensya dahil umano sa hindi nito pagiging ganap na epektibo sa pagpapasikat ng ilan sa kanilang mga TV5 artists. Bagama’t wala pang opisyal na pahayag hinggil dito, ito ang isa sa mga usap-usapang dahilan sa likod ng pagbabagong direksyon ng talent arm ng network.
Opisyal na ilulunsad ang bagong pangalan sa darating na May 5, kasabay ng pormal na anunsyo ng rebranding. Ayon sa mga ulat, ang pagbabagong ito ay bahagi ng mas malawak na plano upang palakasin ang talent development program ng network at makasabay sa patuloy na pag-evolve ng entertainment industry.
Matatandaang kinumpirma ni Manahan ang kanyang paglipat sa TV5 noong nakaraang taon sa pamamagitan ng paglagda ng kontrata—isang hakbang na nagbigay daan sa kanyang mas malaking papel sa paghubog ng mga bagong artista ng Kapatid network.
Sa ilalim ng “Star Worx,” patuloy na aalagaan ang roster ng mga artista kabilang sina Dylan Menor, Ana Ramsay, Sam Coloso, Cedrick Juan, Queenay Mercado, Paulo Angeles, at Ryle Santiago, kasama ang iba pang mga umuusbong na talento.
Layunin ng bagong tatak na mas iangat ang kakayahan ng kanilang mga alaga sa iba’t ibang larangan tulad ng pag-arte, hosting, pagsasayaw, at iba pang performance disciplines. Inaasahang mas palalakasin din nito ang presensya ng kanilang mga artista hindi lamang sa telebisyon kundi pati sa digital platforms.
Sa rebranding na ito, malinaw ang direksyon ng TV5—mag-invest sa bagong henerasyon ng performers at maglatag ng mas matibay na pundasyon para sa hinaharap ng kanilang entertainment division.
No comments:
Post a Comment