Umano’y muling umiinit ang ugnayan nina Manny V. Pangilinan at Gabby Lopez, kasabay ng mga usap-usapang maaaring magbunga ng panibagong kooperasyon sa pagitan ng MediaQuest group at ng Lopez-led ABS-CBN.
Ayon sa mga lumalabas na impormasyon, pinag-uusapan umano ang posibilidad na maipalabas ang ABS-CBN News Channel o ANC sa platform ng Cignal TV, na pag-aari ng MediaQuest ni Pangilinan. Kapag natuloy, inaasahang mas lalawak ang maaabot ng ANC dahil mas malaki ang subscriber base ng Cignal kumpara sa kasalukuyang distribution nito.
Matatandaang matagal nang eksklusibong napapanood ang ANC sa Sky Cable, ang pay TV service na pagmamay-ari ng Lopez family. Gayunman, ayon sa mga ulat, patuloy umanong bumababa ang bilang ng subscribers ng Sky Cable at tinatayang wala na sa 100,000 households ang natitira. Sa kabilang banda, tinatayang nasa humigit-kumulang apat na milyong subscribers naman ang naaabot ng Cignal sa buong bansa.
Kung maisasapinal ang kasunduan, posibleng magsilbi itong simula ng mas malawak pang content partnership sa pagitan ng MediaQuest at ABS-CBN, bagay na matagal nang hinihintay ng ilang observers sa industriya ng media. Sa ngayon, wala pang opisyal na pahayag mula sa dalawang kampo, ngunit patuloy na pinag-uusapan ang posibilidad na ito sa loob ng industriya.
No comments:
Post a Comment