TV5, Patuloy na Hinaharap ang Hamon sa Primetime

 

Patuloy na nahaharap sa hamon ang TV5 sa primetime block nito, ayon sa pinakabagong datos ng National Urban Television Audience Measurement (NUTAM), na sumasalamin sa mas umiinit na kompetisyon sa industriya ng telebisyon sa Pilipinas.

Batay sa NUTAM ratings noong Lunes, Enero 26, ang flagship primetime action series ng Kapatid Network na “Totoy Bato”—na produced ng MQuest Ventures at Studio VIVA—ay nakapagtala ng 1.1% rating. Malayo ito sa mga pangunahing katapat sa timeslot, kabilang ang fantasy series ng GMA Network na “Sang’gre” na may 8.1%, at ang top-rating primetime action drama ng ABS-CBN na “FPJ’s Batang Quiapo”, na nanguna sa 9.6%.

Hindi rin naging maganda ang takbo ng mga reruns ng dating collaboration projects ng TV5 at ABS-CBN Studios—“Nag-aapoy na Damdamin” at “Pira-Pirasong Paraiso.” Mula nang ibalik sa lineup, hindi pa rin lumalagpas sa 1.0% ratings ang dalawang programa.

Samantala, nanatiling matatag sa 2% ang flagship primetime newscast ng TV5 na “Frontline Pilipinas,” ngunit hindi pa rin nito nababawi ang ikalawang puwesto sa overall rankings. Nalampasan na ito ng “TV Patrol” ng ABS-CBN, na nakapagtala ng mas mataas na performance kasunod ng pag-ere ng Kapamilya Channel sa free TV platform na ALLTV2.

Sa kabila ng mga hamon sa primetime, may mga bright spots pa rin ang TV5 sa ibang dayparts. Patuloy na malakas at stable ang viewership ng noontime show na “Eat Bulaga!” at ng afternoon newscast na “Frontline Express,” na nagsisilbing sandigan ng network sa kasalukuyang ratings period.

Ayon sa mga industry observers, may kapansin-pansing pagbaba ng audience share ang TV5 matapos ang pagtatapos ng content supply agreement nito sa ABS-CBN noong Enero 1, 2026. Habang nire-recalibrate ng network ang programming strategy, nakatuon ngayon ang pansin sa mga paparating na original teleseryes ng TV5—“The Kingdom: Magkabilang Mundo,” “A Secret in Prague,” “The Good Doctor: The Philippine Adaptation,” at “My Bespren Emman.”

Itinuturing ang mga proyektong ito bilang posibleng game-changers na maaaring tumulong sa TV5 na makabawi at muling makakuha ng momentum sa primetime sa mga darating na buwan.