Puspusan ang paghahanda ng TV5 para sa 2026 matapos nitong ilahad ang isang all-original program slate sa ginanap na Trade Launch ng network noong Nobyembre.
Binigyang-diin ng Kapatid Network ang kanilang matibay na paninindigan sa paglikha ng sariwa at lokal na nilalaman, na layong maghatid ng de-kalidad na aliwan para sa mga Pilipinong manonood.
Nangunguna sa lineup ang The Kingdom TV Series, isang adaptasyon ng 2024 MMFF film na pinagbidahan nina Vic Sotto at Piolo Pascual. Sa serye, makakasama ni Piolo sina Sue Ramirez, Cristine Reyes, Derek Ramsay, Ryza Cenon, at Maja Salvador. Nasa development din ang The Good Doctor (Philippine Adaptation) na pagbibidahan nina Iñigo Pascual, Ryan Agoncillo, at Gelli de Belen.
Kasama rin sa mga bagong handog ng TV5 ang Project Loki na tampok sina Jayda Avanzado, Dylan Menor, at Marco Gallo; My Bespren Emman na pagbibidahan nina Ai-Ai delas Alas, Shaina Magdayao, at JM de Guzman; at The Secret in Prague na pangungunahan nina Enrique Gil at Andrea Brillantes. Inaasahan din ang pagbabalik ng reality competition na Artista Academy, na iho-host ni Julia Barretto.
Patuloy namang mapapanood ang mga minamahal na programa ng network gaya ng Eat Bulaga!, Face to Face: Harapan, Frontline Pilipinas, Gud Morning Kapatid, Vibe, Sing Galing, Totoy Bato, at Kapatid Mo, Idol Raffy Tulfo.
Nag-udyok ng diskusyon sa social media ang anunsyo, lalo na sa usapin kung tuluyan nang tatahak ang TV5 sa pagiging isang ganap na independent network at kung aalisin na nito ang mga programang mula sa ABS-CBN Studios. Ito ay kasunod ng kumpirmasyon ng TV5 noong Disyembre na nagpadala ito ng termination letter sa ABS-CBN dahil sa umano’y hindi pa bayad na obligasyon.
Samantala, kinilala ng ABS-CBN ang pagkakaroon ng ilang outstanding obligations sa TV5, at nilinaw na hindi ito sinasadya at kasalukuyang inaaksyunan upang maayos.
Habang papalapit ang 2026, malinaw ang direksiyon ng TV5—isang matapang at orihinal na content strategy na nagmamarka ng bagong yugto para sa Kapatid Network.
No comments:
Post a Comment