FPJ’s Batang Quiapo Patuloy Namamayagpag sa Kabila ng Limited Reach

 

Photo courtesy of Sang'gre: Encantadia Chronicles / Facebook

Muling umani ng atensyon sa social media ang Sang’gre: Encantadia Chronicles matapos ilabas ang pinakabagong ratings update para sa 8:00 PM primetime slot nitong January 23. Ang infographic na kumalat ay mula mismo sa opisyal na Facebook page ng serye, kung saan malinaw na ipinakita ang single-channel at multi-channel ratings ng mga magkakatapat na programa.

Kung matatandaan, sa mga naunang posts ay single-channel ratings lamang ang ibinabahagi. Ngunit sa pagkakataong ito, sabay nang inilatag ang datos para sa parehong single at pinagsamang channels, dahilan upang mas maging kumpleto ang larawan ng laban sa ratings.

Batay sa inilabas na datos, nanguna ang Sang’gre: Encantadia Chronicles ng GMA Network na nakapagtala ng 9.2% sa multi-channel ratings (pinagsamang GMA at delayed telecast sa GTV). Sa single-channel naman, nakakuha ito ng 7.5%, na nananatiling mataas para sa naturang timeslot.

Samantala, ang FPJ’s Batang Quiapo ay nagtala ng 3.8% kung A2Z lamang ang pagbabasehan. Gayunman, kapag pinagsama ang ratings mula sa A2Z, ALLTV, at Kapamilya Channel (cable/satellite), umabot ito sa 8.1%, patunay ng malawak nitong audience sa iba’t ibang platforms.

Malayo naman ang agwat ng Totoy Bato, na nakakuha ng 0.8% sa single-channel airing sa TV5. Bahagya itong tumaas sa 1.1% kapag isinama ang One PH sa multi-channel count.

Ayon sa inilabas na impormasyon, ang mga numerong ito ay mula sa January 23, 2026 – Preliminary / Overnight NUTAM People’s Ratings na isinagawa ng Nielsen Philippines. Inaasahan naman ng netizens ang magiging tugon at bersyon ng ratings na ilalabas ng mga Kapamilya pages sa mga susunod na araw.

Sa ngayon, patuloy na mainit ang diskusyon online hinggil sa kung alin ang mas makatarungang basehan—single-channel ba o multi-channel ratings—lalo na sa panahong hati-hati na ang panonood ng publiko sa free TV, cable, at digital platforms.

Kayo, mga ka-trending, ano ang masasabi ninyo sa pinakabagong ratings update na ito? Alin sa tingin ninyo ang mas tama at mas sumasalamin sa tunay na lakas ng isang programa?