Handa na nga ba sa wakas na maging Kapatid ang award-winning actress na si Angelica Panganiban? Usap-usapan ngayon sa entertainment circles ang diumano’y posibilidad ng paglipat ng aktres sa TV5, na lalong nagpasiklab ng pananabik sa mga tagahanga.
May mga nagbulong diumano na nais sundan ni Angelica ang mga beteranong personalidad na sina Johnny Manahan o mas kilala bilang Mr. M, at Shaina Magdayao, na kapwa nauna nang mapabilang sa TV5. Ayon sa source, kung sakaling matuloy ito, isang happy reunion umano ang magaganap—lalo na’t matagal nang magkakaugnay ang kanilang mga landas sa industriya.
Hindi maikakaila ang husay at lawak ng talento ni Angelica Panganiban—mula drama hanggang comedy, patunay ang kanyang mga parangal at iconic na pagganap sa telebisyon at pelikula. Kung lilipat man siya sa Kapatid Network, napapanahon umano ito dahil patuloy na nagpapalakas ang TV5 ng mga dekalibreng programa at nag-iipon ng mga bigating pangalan para sa bagong yugto nito.
Malaki rin umano ang magiging ambag ni Angelica sa lumalawak na roster ng MediaQuest Artist Agency, na patuloy na dinaragdagan ang hanay ng mga respetado at bankable na artista. Bukod sa kanyang talento at karisma, dala ni Angelica ang tatak ng husay, galing, at natural na ganda—mga katangiang siguradong tatanggapin ng Kapatid audience.
Sa ngayon, nananatiling espekulasyon pa lamang ang lahat. Ngunit kung ito’y magkatotoo, malinaw ang mensahe ng marami: welcome na welcome ka sa TV5, Kapatid!
No comments:
Post a Comment