PRC, Pinalawig ang Pagtanggap ng CPD Undertaking sa License Renewal hanggang Hunyo 30, 2026

 

MANILA, Philippines – Opisyal nang pinalawig ng Professional Regulation Commission (PRC) ang pagtanggap ng CPD Undertaking para sa pagre-renew ng Professional Identification Card (PIC) o PRC license hanggang Hunyo 30, 2026.

Inanunsyo ito ng PRC sa isang Facebook post nitong Biyernes, Disyembre 26, bilang karugtong ng naunang extension sa ilalim ng Resolution No. 1908, Series of 2024, na unang nagtakda ng deadline hanggang Disyembre 31, 2025.

Sa ilalim ng extension na ito, maaari pa ring makapag-renew ng lisensya ang mga propesyonal kahit kulang o wala pang CPD units, basta magsumite ng CPD Undertaking, at walang karagdagang bayad.

Paano Mag-renew ng PRC License gamit ang CPD Undertaking

Narito ang mga hakbang ayon sa PRC:

1. Mag-log in sa PRC LERIS, i-check ang photo requirements, at piliin ang Renewal.

2. Piliin ang iyong propesyon at ilagay ang PRC License Number.

3. Piliin ang Renewal with Undertaking kung kulang o walang CPD units.

4. Bayaran ang renewal fee sa PRC-accredited payment channels.

5. Pumili kung PRC branch appointment o PRC ID delivery (shipping).

6. Kung delivery, hintayin ang instructions sa delivery fee at address; kung branch pickup, dumalo sa nakatakdang petsa.

7. Tanggapin ang na-renew na PRC ID.

Nilinaw ng PRC na ang pagpirma sa CPD Undertaking ay hindi pag-waive sa CPD requirement. Ang kakulangan sa CPD units ay idadagdag sa susunod na renewal cycle.

Ayon pa sa PRC, kahit ang mga propesyonal na nakapagsumite na ng CPD Undertaking sa nakaraang renewal ay maaari pa ring magsumite muli sa kasalukuyang renewal period.

Bakit May Extension?

Ipinaliwanag ng PRC na ang extension ay upang magbigay ng sapat na panahon para sa:

• Orientation at capacity building sa mga panukalang revised guidelines para sa Recognition, Validation, and Accreditation (RVA) ng learning outcomes mula sa:

  • Self-Directed Learning (SDL)

  • Professional Work Experience (PWE)

  • Informal Learning (IL)

• Pagpapalakas at pagpapabuti ng CPD Accreditation System.

Ano ang CPD?

Ang Continuing Professional Development (CPD) ay mandato ng Republic Act No. 10912 o CPD Act of 2016. Layunin nitong matiyak na ang mga lisensiyadong propesyonal ay:

• Patuloy na may sapat na kaalaman at kasanayan

• Nakaaayon sa global standards

• Handa sa mabilis na pagbabago ng industriya

Ilan sa mga paraan ng pagkuha ng CPD units ay:

• Formal Learning – master’s at doctoral programs

• Non-Formal Learning – seminars, trainings, publications, consultancy

• Volunteer Work – medical missions, environmental projects, disaster response

Para sa Overseas Filipino Workers (OFWs), maaari silang ma-exempt sa CPD requirement sa pagpapakita ng patunay ng overseas employment, at maaari ring kumita ng CPD units sa pamamagitan ng online seminars o webinars na accredited ng gobyerno.

Sa mga nagdaang taon, ilang mambabatas ang naghain ng panukalang batas upang amyendahan o tuluyang alisin ang CPD law dahil sa umano’y dagdag gastusin para sa mga propesyonal. Gayunman, ang mga panukalang ito ay nananatiling pending o hindi naisabatas.

Sa ngayon, nananatiling epektibo ang CPD law—ngunit sa tulong ng extension na ito, mas nabibigyan ng ginhawa at oras ang libo-libong propesyonal sa buong bansa.