Janine babawiin si Brent kay Mika?

 

Bagamat muling nabuhay ang kilig ng fans sa tambalang Janine Teñoso at Brent Manalo dahil sa lumang music video ng kantang “Apat na Buwan”, malinaw ang sagot ng singer-composer sa tanong kung may balak ba siyang “babawiin” si Brent mula kay Mika Salamanca — at ito ay isang malaking “hindi.”

Bago pa man napanalunan ni Brent ang titulong Big Winner sa PBB Celebrity Collab Edition bilang kalahati ng viral na BreKa (Brent-Mika) tandem, una na siyang naging onscreen boyfriend ni Janine sa nasabing music video. Ayon kay Janine, matagal na raw niyang pina-follow sa Instagram si Brent, kaya agad siyang pumayag nang siya'y i-cast bilang love interest sa kanyang heartbreak song.

“I knew he’d fit the role and it really worked,” ani Janine sa press conference para sa kanyang upcoming solo concert.

At kahit pa nagkaroon sila ng short but memorable onscreen chemistry, sinabi ni Janine na masaya siya sa kasalukuyang tagumpay ni Brent — at sa kanyang real-life team-up kay Mika.

“Hindi ko naman siya babawiin, ‘noh?” pabirong sagot ni Janine na sinundan ng tawa.

Sa usapin naman ng kanyang own love life, natanong si Janine kung masaya rin ba siya sa personal niyang buhay pag-ibig. Simple at makahulugan ang kanyang sagot: “Okey naman po.” Sabay sabing magsisimula na raw siyang magsulat ng mas masayang mga kanta — senyales kaya ito na hindi na puro hugot at heartbreak ang laman ng kanyang mga awitin?

Ang kanyang bagong musical direction ay mararamdaman sa kanyang kauna-unahang major solo concert na pinamagatang “Janine” sa darating na September 6 sa New Frontier Theater. Isa itong musical narrative ng kanyang journey bilang singer-songwriter — mula sa pagiging kontesera noong 16 anyos hanggang sa pagiging tinaguriang “OST Princess” ng Viva.

Magsisilbing musical celebration ang concert na ito, kung saan makakasama niya ang mga frequent collaborators niya gaya nina Arthur Nery, Rob Deniel, The Juans, at Cup of Joe.

Ang kanyang karanasan, kwento ng pag-ibig (at hindi pag-agaw ng pag-ibig!), at talento ang tunay na highlight ng concert — at hindi ang mga haka-hakang love triangle.

Tickets for Janine are now available via TicketNet.