Hindi pa man humuhupa ang kasiyahan sa makasaysayang pagkapanalo ni Vice Ganda bilang Best Actor sa 51st Metro Manila Film Festival para sa pelikulang Call Me Mother, agad namang bumungad ang samu’t saring negatibong reaksiyon sa social media—kabilang na ang mga komento na malinaw na may halong pangmamaliit at homophobia.
Sa ilang kumakalat na screenshots online, makikita ang mga komento na kinukuwestiyon ang pagkapanalo ni Vice hindi batay sa kanyang pagganap, kundi sa kanyang itsura, makeup, at gender expression. May mga nagsasabing “paano naging Best Actor” kung naka-makeup o bihis-babae, habang ang iba nama’y tila ginagawang biro ang pagtawag sa kanya bilang “Sir,” na para bang hindi niya karapat-dapat ang titulo.
Para sa maraming netizens, malinaw na hindi na ito usapin ng pelikula o acting prowess kundi ng diskriminasyon. Iginiit ng mga tagasuporta ni Vice na ang MMFF awards ay nakabatay sa husay sa pag-arte, lalim ng karakter, at impact ng pelikula—hindi sa kasarian o pananamit ng aktor.
“Actor ang kategorya, hindi lalaki o babae,” ayon sa ilang fans. “Kung performance ang pag-uusapan, malinaw kung bakit siya nanalo.”
Matatandaang sa kanyang acceptance speech, naging bukas si Vice sa pagsasabing hindi niya inaasahang mananalo, bagay na lalo pang nagpatingkad sa bigat ng kanyang tagumpay. Para sa marami, ang kanyang panalo ay hindi lamang personal na milestone kundi simbolo rin ng unti-unting pagbubukas ng industriya sa mas inklusibong pananaw sa sining at talento.
Sa kabila ng mga mapanirang komento, mas nangingibabaw pa rin ang suporta ng publiko kay Vice Ganda. Para sa kanyang mga tagahanga, malinaw ang mensahe: ang galing sa pag-arte ay walang kasarian, at ang tunay na sukatan ng isang aktor ay ang kanyang performance—hindi ang opinyon ng mga ayaw umusad kasama ng panahon.
No comments:
Post a Comment