Angeline Quinto, Nais Magkaanak ng Isang Dosenang Bata: “Para Isang Team Kami”

 

Ipinahayag ni Kapamilya singer Angeline Quinto ang kanyang pangarap na magkaroon ng malaking pamilya, katuwang ang asawang si Nonrev Daquina. 

Noong Linggo, Hunyo 29, inusisa ang singer kung may balak pa ba siyang sundan ang kanilang mga anak.

Biro ni Angeline, nais daw niya ng labindalawang anak.
“Twelve po ang gusto ko para isang team kami,” aniya habang natatawa. “’Pag nagkaproblema ang tatlo, may nine pa na sasalo.”

Gayunpaman, inamin ng mang-aawit na maaaring hindi niya maabot ang nasabing bilang dahil sa kanyang kalagayang medikal.
“Gusto ko sanang kabugin ang BINI, pero dahil CS ako, malabo ’yon. Puwede siguro hanggang apat kung mamadaliin, hahaha!” dagdag niya.

Sa ngayon, masayang-masaya si Angeline bilang ina kina Sylvio at Sylvia. Ayon sa kanya, malaki ang pagbabagong idinulot ng pagiging isang magulang sa kanyang pananaw at pagkatao.

“Feeling ko mas bumait ako. Mas pinapahalagahan ko na ‘yong oras, lalo na’t ayokong mamiss ang kahit anong milestone ng mga anak ko,” pagbabahagi niya.

Inamin rin niyang may mga pagkakataong nagkakaguilty siya kapag hindi niya nasasaksihan ang ilang mahahalagang yugto sa buhay ng kanyang mga anak.
“’Yun ang pinakamahirap — kapag may na-mi-miss akong moment.”

Matatandaang ikinasal sina Angeline at Nonrev noong Abril 2024 sa simbahan ng Quiapo. Simple ngunit punung-puno ng pagmamahalan ang naging seremonya. Mula noon, naging mas matatag ang paninindigan ng singer para sa kanilang relasyon.
“Habambuhay kong ipaglalaban ang mister ko,” saad niya sa isa pang panayam.

Ngayon, mas nakatuon na si Angeline sa kanyang pamilya habang patuloy pa ring aktibo sa kanyang showbiz career. Hinahangaan siya ng maraming tagahanga dahil sa pagiging hands-on na ina at sa mahusay niyang pagbabalansi sa pagitan ng trabaho at buhay pamilya.

Bagama’t maaaring hindi niya marating ang target na “isang dosenang anak,” ipinapakita ni Angeline na sapat na ang tunay at wagas na pagmamahal upang mabuo ang isang masayang pamilya. Sa bawat araw na kasama ang kanyang mga anak at asawa, natutupad niya ang pangarap niyang buhay—simple man ito, ngunit puno ng pagmamahalan.